Biloko tozwi
1. Tata otondisa bibale bya biso na mbisi ndenge na ndenge
Topepi tozwi toyei kobonzela Yo
Otondisa zamba na esobe na biso na nyama ebele
Lifut’a bokila toyei kobonzela Yo.
Refrain. Biloko tozwi tokobonzela Yo lokola Abarama Tata wa biso
Tokosenge Yo oyamba byango lokola libonza ly’Abele mosaleli wa Yo
2. Onokisaki mbula mpe bilanga binso bikoli malamu
Tobuki ndunda toyei kobonzela Yo
Obimisaki moi mpe mbuma ya nzete inso ikomeli
Yang’oyo tomemi toyei kobonzela Yo
3. Opesaki biso makasi na misala minso tosalaki
Lifuta tozwi toyei kobonzela Yo ;
Manso tosalaki o kati ’a mikolo minso milekaki
Tomemi mango toyei kobonzela Yo
4. Bandeko banso bazali na mpasi o kati ya lopitalo,
Tokokanisa bango toyei kobonzela Yo
Baye banso bakangemi na mpasi’o kati ya boloko
Tokokanisa bango toyei kobonzela Yo
5. Tala baboti, tala bana, tala bakolo mpe bilenge
Toyei banso toyei komibonza na Yo
Tala mampa, tala vino, tala lifuta lya misala mya biso
Tomemi manso toyei kobonzela Yo.